أزمة شغل

أزمة شغل

الحياه من غير شغل وكفاح ماتبقاش حياه

لما كنت شغال وربنا كرمنى كان فى ايام الواحد بيكسل ومش بروح الشغل

كان فى ايام اجازات واعياد للبلد كنا مش بنشتغل كنت بستريح فى الايام دى شويه

يعنى كنت اسهر باليل واصحى من النوم براحتى

فى يوم من الايام بنشتغل فى امان الله لقينا الشرطه جايه علينا بتقولنا وقفو الشغل

بنسال ليه قالو الاضيه بتاعة الشغل ده وقفت واحد من الجران قدم شكوه ان احنا بنشتغل قبل معاد الشغل ونخلص بعد الميعاد

بقالى اسبوع قاعد من الشغل اول مره احس ان الحياه مالهاش قيمه من غير شغل

ممكن علشان انا اخدت على التعب والشقى ولا انا الى فقرى مش بحب الراحه

بس حاسس انى زهقان ومدايق الى زينا مش اخدو على الراحه

والله انا اتهيالى لو حد قالى تعالى اشتغل ببلاش هروح علشان افك عن نفسى

بجد بجد القاعده وحشه جدا

معنى الغربه

أجد نفسى احتاج للتوقف أحياناأفكر فى معنى الغربة الحقيقة

أفكر فيما هو المقصود من الوطن

وما هى الغربه

هل هي غربة الآهل ؟هل هي غربة الديار والارض ؟

هل هي غربة النفس ؟

بنعيش خارج بلدنا فنتكلم عن الغربةهل هي العيش بعيد عن بلدك ؟

عندما تعيش خارج بلدك تعلم انك لست في بلدك وانك لست من اصحابها فتشعر بالغربة!

حقا هذه هي الغربه

عندما تعيش خارج بلدك قد يتعامل معك رغم غربتك بكل احترام وتسامح وانسانية!

عندما تكون في بلدك يتعامل معك دوما رغم وطنيتك بكل اذلال ومهانة ولا انسانية!

والله العظيم بيحصل كتير اوى

عندما تعيش في الخارج تفتقد من تحبهم وتشتاق اليهم وتتنمى ان تعود لتراهم !

عندما تعود الى بلدك تكره نفسك وتكره كل من حولك وتتمنى الخروج من بلدك ووطنك النهارده قبل بكره !

عندما تعيش خارج بلدك قد تجد احيانا كثيرة الامن والطمأنينة!

عندما تصل الى مطار بلدك تشعر فورا بالقلق والانقباض وعدم الامان ....ماحدش يسالنى ليه!

لانى مش عارف او عارف بس مش لازم اتكلم

عندما تعيش في خارجها قد تجد التقدير والحياة الكريمة!

عندما تعيش داخل بلدك تجد دوما التعب والمشقة و اهدار الكرامة في كل مكان تذهب اليه!

انا مابقتش قادر خلاص ولا على الغربه ولا على انى ارجع وسط اهلى واخواتى

اعمل ايه حد يقولى

ـــ ـــ ــــ ـــ ــــ ـــ ـــ ـــ ـــ ـــ ـــ ـــ ـــ ـــ ـــ ـــ ـــ ـــ ـــ ـــ ـــ ـــ

\ كلامى ده مافيش حد هيحس بيه الا واحد متغرب مثلى سايب بلده \

ــ ــ ــ ــ ــ ــ ــ ــ ــ ــ ــ ــ ــ ــ ــ ــ ــ ــ ــ ــ ــ ــ ــ ــ ــ ــ ــ ــ ــ ــ

مخنوق من الدنيا

بعتذر ياجماعه عن غيابى عنكو يارب تكونو جميعا بخير

بس بمر بظروف صعبه ومش فايق افتح النت

جيت اقولكو كل سنه وانتو طيبين

عيد ميلاد الشقى

ده حبيبى ياولاد

النهارده عيد ميلاد الشقى عبد الله اخويا جيت اهنيه بيه علشان بيصيع عليا اوى مش يعرف معزته عندى قد ايه

ولا ياعبدو اخوك بيقولك كل سنه وانت طيب ياحبيبى

النهارده زاد عمرك سنه محتار اهديك ايه قولى انت عايز ايه

عايز عمرى عايز روحى انت بس اطلب

النهارده

عيد ميلاد السعد

عيد ميلادالفرح

عيد ميلاد الصبا

عيد ميلاد الحسن

عيد ميلاد الشفافيه

عيد ميلاد الجمال

عيد ميلاد الحب

عيد ميلاد اشياء كتيره

عيد ميلادك انت

عيد ميلاد جديد

عيد ميلاد سعيد

دى اجمل تورتايه منى ليك حبيبى

الى يهنى عبد الله ليه منى امووووووووووووووواه بوسه

كان يوم صعب

كان يوم صعب بجد

اليوم ده قبل ما أطلع من البيت الصبح وانا مش مستريح المهم رنيت على حبايبى صبحت عليهم زى العاده واتوكلت على الله

اول حاجه حصلت على الصبح كدا المترو اتعطل وغاب وطبعا كدا هتاخر على ميعاد الشغل اخدت تاكسى بسرعه وروحت على الشغل

يدوب انا وصلت كدا والمهندس كان ماشى كدا يعنى كنت هروح وارجع ويارتنى كنت رجعت

قالى على الشغل الى هعمله ومشى راح يجبلنا قافيه وجاى غيرت انا هدومى وبدات الشغل

الجو كان حر مووووووت على الساعه 10 الصبح كانت درجة الحراره 41 درجه

جه المهندس بالقهوه شربنا القهوه وقومت اشتغلت تانى كانت دماغى مشغوله بحاجات كتير

ومش عارف ابطل تفكير حتى وانا فى الشغل بعد الظهر ماسك الصاروخ بقطع بيه زاويه الصاروخ عدى على رجلى بس الحمد لله ربنا ستر وجات سليمه روحت البيت اتخانقت مع صاحبى

وسبته ونمت علشان كنت مرهق اوى صحيت من النوم اخدت حمامى ولسه هعمل حاجه ناكلها جات ست اعوذ بالله الى بتنظف العماره

جايه تزعق من غير اى حاجه وانا صاحى من النوم قرفان ومدايق فضيت غلى فيها وكنت هخنقها وربنا قفلت فى وشها الشباك وسبتها تبرطم ودخلت اكمل الطبيخ

قولت اليوم ده هكتبه علشان يبقى ذكرى سوادا

شوفو دى وانا شغال بس فى يوم تانى مش فى نفس اليوم

شغل جبابره

ازاى تخلى البنات تحبك

تعالو نتعرف على الحب ونشوف يعنى ايه حب وازاى نحب ونتحب

ما هو الحب................؟
الحب هو احساس خفي قوي يهز المشاعر ويحرك القلب من مكانهالحب ليس كلام ولكن الحب افعال الحب ليس كلمة تقال الحب كلمة تقراء من العين ومن افعال وتصرفاتمن يحب
كيف تجعل الفتاة تحبك ؟
بان تجعلها تحس بانها ملكة متوجة جالسة علي عرش قلبك. حبك هو دستورها الذي تحكم به بان تجعلها تحس بانها الحاكمة والمالكة في هذا الكون وايضا تجعلها تحس بانها اجمل ما رات عينيك وايضا اخر ما رات عينيك
كيف تجعلي الشاب يحبك ؟
ان تثبتي له انه الشاب الوحيد في حياتك وانه ايضا الهواء الذي تتنفسيه والماء الذي تشربيه وان تسمعي كلامه في الشئ الصحيح وليس في الاشياء الخطاء وان تفهمي ما يريد قوله من قبل ما ينطق به ولا تدخلي احد بينكما مهما كان قريب منكم ((اصحاب )) تكلمي معه برقه وامشي معه بخفة ورشاقة وشياكه واجعلي من شخصيتك شخصية تجذب كل من راها وتكلم معاكى
كيف تتاكد من حب الفتاه لك ؟
ليس بحلفان او بالاختبارات كما يفعل البعض (الجهلاء) باحساسك الداخلي لمن تحب ومن تصرفاتها تجاهك ومشاعرها ايضا وتكفي كلمة واحدة تلخص كل مادخلها وهي (بحبك) من هذا تتاكد
كيف تتاكدي من حب الشاب لكي ؟
ان كان حب الشاب حقيقي سوف يظهر من تصرفاته مثلا (الغيرة-الخوف عليكي) وهذان الشيئان كافيان جدا وايضا ان لا يرضى لكى ما لا يرضاة لاخته
كيف تعاملان بعضكم البعض ؟
المعاملة لابد لها من اسلوب رقيق هادي عامليه كما يعاملك وان كان فعامليه احسن مما يعاملك حتى تحافظى عليه وعلى حبه وهو ايضا سوف يراعى ما تفعلين له
الحب والمناسبات الخاص به ؟
عيد الحب مثلا لا داعي لشي سوي كلمة واحد تلخص كل ماتريدون وهي(بحبك) وهذه الكلمة سوف تجعلكما تشعران بان الحب خلق من اجلكما
ما هى نهايه الحب الحقيقى.....؟
ان كانت نهايه سعيده فسوف تنتهى بالزواج وان كانت حزينه فسوف تنتهى بالفراق او الموت وفى كلتا الحالتين الفراق او الموت فالجراح موجوده فى القلب والالم ايضا
كيف تكون النهايات الاخرى...؟
اذا كنتى تحبى هذا الشاب وواثقه من حبك له وهو ان كان يحبك ايضا ستقفوا معا امام كل الظرف والعقبات لتفوزوا بحبكما
اما ازا كان بيتسلى وانتى تحبيه فسوف تكون النهايه سهله له وصعبه لكى فهو سوف يزهب لاخرى اما انتى فسوف تعيشين جريحه
اما ان كانت تتسلى بك وانت تحبها فاتركها واعلم ان قلبك لن يظل جريـح وسوف تاتى من يداوى لك جراحك وتجعلك تنهى جرحك وحبك لها
ان كنتما انت وهى تتسلان ببعضكما لبعض فانهايتكما سوف تكون سهله لان كل منكما لايحب الاخر ولن تحبو بعض والشئ الوحيد الزى سوف يكون بينكما (هو مجرد لعب عيـــال) و
اما ان كنتما تحبا بعض ووقفت امامكم الظروف والمشاكل فحاولو مره واثنين ومائه
وان لم تجدو الحل فاعلمو ان هذا هو قدركم والمكتوب لكم ان كل قلب من قلوبكم يعيش بعيد عن الاخر ولكل منكم زكره فى قلبه اهذا الحب الحزين واعلمو ايضا ان الزكرى هو ما يبقى للانسان لان الانسان عباره عن زكـــــــرى

النهارده ياجماعه هحكى قصة بدايتى مع الغربه اولها كان موت واوسطها كان اسر وحرمان واخرها مش عارف هيوصلنى لفين



المهم هنبدا الحكايه


انا كنت انسان عادى كنت عايش حياتى فى مصر مدرسه وفسح وبنات ماكنتش حاسس بنفسى زى اى شاب طبعا فى مرحلة المراهقه جه الوقت الى حسيت فيه بوالدى شقى كتير وتعب كتير علشانى انا واخواتى حاولت اعمل حاجه اساعده برغم انا كبير اخواتى والدى ماقصرش معايه فى اى حاجه بالعكس كان دايما عايزنى ابقى احسن منه وانا فى الابتدائى قدملى علشان ادخل مدرسه حربيه بس ماقبلتش كان لازم وسطه جامده علشان يقبلونى طبعا ماقبلتش ولما كبرت قدملى تانى فى معهد امناء الشرطه وطلعونى ولاد الايه فى الكشف الطبى قالولى ودنك صغيره يعنى ايه ودنى صغيره مش فاهم مش بسمع يعنى طبعا علشان يصفو ويقبلو الوسايط المهم علشان مش تزهقو من الرغى بتاعى خلينا نكمل


اتعقدت من التقديم فى الشرطه الشرطه وزهقت من حياتى قررت اسافر وابنى مستقبلى بس عايز اقولكو حاجه هدف غربتى كان سبب واحد كنت عايز اشيل حمل والدى واستر اخواتى البنات هما اتنين تؤام بس مدوخنا حاولت ابحث عن السفر طبعا ماكنش فى غير الطريقه غير الشرعيه الهرب الى اوربا كان الطريق مقفول برده وناس بتغرق كتير حاولت اصرف نظر عنه مش خايف لا بس كان برده مش معايه 3000 يورو حق الرحله جه ميعاد ادخل الجيش طبعا روحت وقدمت ورقى وكان نفسى اخد تاجيل او مادخلش برده علشان اكمل مشوارى مع والدى واحاول اساعده وابنى مستقبلى انا واخواتى بس حظى كان سئى جدا دفعتى دخلت والتاجيل بتاعى وقف على يوم واحد اول الدفعه كان يومى7\4 ده يوم غريب فى حياتى مواقف كتير حصلت فيهخلاص كان باقى على الميعاد ده 10 أيام فى الوقت ده ظهرت تانى فرصة سفروقالو هنركب المركب ونسافر روحت وركبنا وكانت رحلة موووووووووووووووووت

كان يوم28\3\2005

يوم الهروب شوفت عذاب ماشوفتوش فى حايتى اول يوم عدى سهل تانى يوم لقيت دماغى مش فيا مش حاسس بنفسى لو وقفت بقع جالى دوار البحر كانو يجبولنا اكل ماكنش ليا نفس اكل اى حاجهبعد كدا جعت اوى اكلت فات 3 ايام على الحال ده وكنا عدينا جزيرة كريت ودى حدود اليونان وقالو هندخل البلد الليله لكن حصلت ظروف والشرطه كانت بتلف كتير فى البحر ماردوش يدخلونا
جات الكارسه الى ماكنوش عاملين حسابها الميه والاكل وكل حاجه خلصت ركنا جنب جزيره جبل ونزل عدد كبير يدور على اكل كنا بنموت من الجوع فى الوقت ده كان فات 7 ايام وفى اليوم التانى البحر هاج والمركب بقت تموج بطريقه فظيعه لدرجة الميه كانت بتطلع عليها فوق اه نسيت اقولك دى مش مركب ده كان زورق بتاع صيد سمك مش بقولكو رحلة موت المهم فضل الحال على كدا لمدة يوم بليله
واخيرا البحر هدى مره واحده خالص بقى حصيره زى الباحرين مابيقولو جالهم اشاره ان المقابل مستنى على الشط واخيرا اتحركت المركب ووصلنا للمقابل خلاص اول ماشوفنا النور بتاع اتينا كلنا ردت فينا الروح مابقناش حاسين بالجوع بعد ماكنت بدعى اروح لاهلى تانى بخير بقيت ادعى ربنا الى وقف جنبنا ووصلنا على خير اول مانزلنت من المركب مابقتش عارف امشى دماغى كانت بتلف بطريقه فظيعه والحمد لله وصلت بالسلامه انما والى معايه 100 شخص كانت بردو ظروفهم صعبه زى حلاتى بالظبط فى اخر القصه

فى يوم غريب فى كل ده وانا بعز اليوم ده اوى اوى يوم

(( 7\4))

اليوم ده

اولا عيد ميلادى

ثانيا كان اليوم الى المفروض استلم فيه مخلة الجيش

ثالثا يوم دخولى اليونان

ومن هنا بدات رحلة اســـــ الغربه ــــــير


شوفتو بقى انها رحلة موت ولا لا شوفت الموت بعينى

والسلام عليكم ورحمة الله وبركاته